Weggesteek agter ZAR-styl en moderne geboue wat ongemaklik teenmekaar sit, lê ’n Pretoria stadslandskap van agterstrate, binnehowe en vuil venstertjies, weggooikatte en rooibaksteenmure. Onsigbaar vir die oë op straat, lê ’n Pretoria-daklandskap van antennas en duiwe, silwer oppervlaktes wat die son laatmiddag deur wasige wolke vang, en mooi uitsigte. Pretoria-landskappe ryp om in te leef. In hierdie ruimtes ingevleg tussen die hoofstroom ruitenet, kan nuwe plekke ontgin word - ’n verdigting van die stadsweefsel. Daar is ’n behoefte aan middestedelike woon – kyk na die muurpapier van koffiewinkels in voorstedelike winkelsentrums: tonele uit Chicago en New York. Petrol word duur. Grond raak op. Globale identiteit heers.