Die staat bly die belangrikste politieke en selfs ekonomiese instelling in Suid-Afrika, ongeag van hoe positief of negatief dit beoordeel word. Ofskoon Die Vrye Afrikaan verbind is tot ’n Suid-Afrika van selfstandige, selfrespekterende gemeenskappe, kan dié ideaal nie sonder besinning oor die staat nagejaag word nie.

In Suid-Afrika word dikwels baie energie aan beleidsontwikkeling bestee. Kommoditeitsgedrewe ekonomiese groei het die afgelope jare die staat se koffers gevul. Maar wat help beleid en fondse as die staat se vermoë afneem? En watter bedreigings hou gebrekkige staatsvermoë vir die demokrasie in? Dit is nie verniet dat Suid-Afrika tans die hoogste per capita-proteskoers ter wêreld het nie.