Staan wankel gevestig

in eie labirint:

twee arms en ´n been

stomp afgebind.

Die kop nogtans trots

is skuins weggedraai

na die Ouwêreldsee

en ´n wyndonker baai.

Sien hy bollende seile

na Griekeland vaar

met Theseus en Ariadne

voorlopig ´n paar?

Of sien hy vooruit

hoe die vyand hom stort

van ´n loodregte krans

en sélf offer word?

Néé: die stukkende dier

wil vir oulaas aanskou

hoe ´n vader se trane

´n see laat verblou.