Dit is alombekend dat Suid-Afrika se grondwetlike onderhandelaars in die vroeë 1990’s in weerwil van moderne neiging wêreldwyd demokrasie tot ´n eenheidstaat verbind het in plaas daarvan om ook behoorlike voorsiening vir minderhede te maak op ´n federale grondslag. Een van die wêreldleiers in hierdie verband is Spanje, waar ´n nuwe statuut van Katalonië tans voor die parlement dien. In die eerste van ons twee artikels in hierdie dossier gee Antonio Segura I Mas ´n oorsig oor die Kataloonse geskiedenis en stryd om outonomie. In die tweede artikel vertel Víctor Gómez Pin die kultuurpolitieke verhaal van die Kataloonse taal, wat in sekere opsigte aan die verhaal van Afrikaans herinner.